Caturtuo saruna par volūdu ar literatu, literaturzynuotnīku, kas debitejs literaturā kūpā ar Oskaru Seikstu 1995. godā ar dzejūļu kruojumu – stuostu – “Seppuku iz saulis vādara”, Valentinu Lukašaviču. Tu vari klauseitīs tū tīši šudiņ, 15. novembrī, kod Oskaram palīk 50. Tu vari pasadaleit ar jū klusumā…
Oskars Seiksts:
✅ Sovejū, lītavīšu, varu klauseitīs, varu saprast, varu parunuot, referatu nūlaseit. Angļu, poļaku maņ saprasšona loba. Asu pasavuicejs čehu, slovaku, horvatu. Kai vīnā piļsātā asu dzeivi nūdzeivuojs, tai vīnā volūdā.
✅ Maņ ir gryuši sprīst par sovejuos volūdys pasavierīni nu molys. Es tūmār nu vyda verūs, voi tys ir lobuok voi švakuok. Taipat ari iz piļsātu es verūs nu vyda. Maņ ir gryuts dūt kaidu pasavierīni nu putyna liduojuma voi turista redzīņa, voi cyttautīša voi ībraucieja, nu molys.
✅ Es vysod asu bejs vaira klauseituojs nakai runuotuojs. Partū maņ itymā diapazonā nu volūdys da klusuma ir klauseituoja pīredze. Es varātu teoretizēt, kas ir klusuma autors. Kas ir volūdys autors, mes varātu pasprīst i dazynuot.
✅ Ar kotru volūdu īt ari sova dzeivis ziņa, pasauļa redzīņs, taipat kai dzeļža tehnologejom, dzeļža kausiešonys vysom pataisem, pīredzem pa Eiropu izaplateja keltu volūdys. Angļu volūda aizguoja ar tehnologejom, datortehnologejom. Taipat myusejuo volūda, kai cytys baltu volūdys, īspiejams, slavu volūdys, tūmār ir saisteitys ar zemis cylvāka pīredzi, zemis cylvāka saprasšonu.
✅ Mani nikod nav interesiejs pasauļs, kurā kiborgi runuotu latgaliski.
✅ Tai kai aizīt zemei pīsaisteitūs cylvāku redzīņs, tikpat pluonuoks palīk latgaliskuma dīdzeņš. Var sataiseit bīzu, bīzu Latgolys terminologejis vuordineicu, cik jamā byus latgaliskuma, tys ir lels vaicuojums.
LKB projekts “Atīsmis – Oskara Seiksta dzejā, sarunuos, latgalīšu i pūļu volūdā” teik realizāts ar Vaļsts kulturkapitala fonda mierķprogramys “Latvīšu viesturiskūs zemu atteisteibys programa”, bīdreibys “Latgolys regiona atteisteibys agentura” i Rita Wessius Foundation (Zvīdreja) atbolstu.
