27. aprelī 15:00 stuņdēs gūdynuosim Latgolys kongresa dīnu pīminis šaļteņā pi pīminis vītys “Latgolys kongresam – 100”, dūsimēs guojīnī pi pīminekļa “Vīnuoti Latvejai”, nūlīkūt zīdus na tik pi obejim pīmineklim, tok ari daudzajiem Latgolys dižgarim, kuru pīminis vītys ir Rēzeknē, i pateiceibu šaļteņā pīsadalēsim divūs nūslāgumūs – patriotyskuos izalauzšonys spēlis “Kroma kolna bruoliste” uzvarātuoju i Zemissardzis 3. Latgolys brigadis 32. kuojinīku bataljona muoceibu lobuokūs zemissorgu gūdynuošonā.
2017. goda 5.–6. majā Rēzeknē nūtyka Latgolys symtgadis kongress, kas atguodynuoja Latvejis i pasauļa sabīdreibai par Latgolai nūzeimeigim divim kongresim Rēzeknē: 26.–27. aprelī (piec j. st. 9.–10. majā), kurā tyka pījimts viesturisks lāmums par latvīšu vaļstsnāceju i kūpeigys vaļsts veiduošonu ar Vydzemi i Kūrzemi, paturūt pošnūsasaceišonys tīseibys tautsaimnīceibys, volūdys i ticeibys vaicuojumūs, i 3.–4. decembrī (piec j. st. 16.–17. decembrī). Ūtruo kongresa rezultatā tyka panuokts, ka tuo laika treis apriņči — Rēzeknis, Ludzys i Daugovpiļs — teik atdaleiti nu Vitebskys gubernis. Latgolys apreļa kongress ir vīns nu pyrmūs, kas aktualizej kūpejis Latvejis vaļsts ideju i sagatavej politiskū i sabīdryski izgleitojūšū platformu Latvejis vaļsts dybynuošonai 1918. goda 18. novembrī.
2017. goda Latgolys symtgadis kongress pījēme rezoluceji i izveiduoja Saīta rezolucejis izpiļdis komiteju (SaRIK), kas atbiļd par rezolucejis izpiļdi i organizej nuokamū Latgolys kongresu (šūbreid – Latgolys kongresa lāmumu izpiļdis padūme, LKLIP). Pasateicūt itom iniciativom, nu 2019. goda 27. apreļs kai Latgolys kongresa dīna ir īraksteita svynamūs dīnu lykumā i gūdynuota ari Saeimā.
Jamūt vārā īdybynuotuos tradicejis i izmontojūt īspieju, ka svātku reize īkreit svātdīnē, aicynojam sevkuru Latgolys īdzeivuotuoju i gostu byut kluot pīminis šaļteņā pīminis vītā „Latgolys kongresam – 100”, pīsadaleit guojīnī i pateiceibu šaļteņā pi pīminekļa „Vīnuoti Latvejai”. Iz pasuokumu ir aicynuots Vaļsts prezidents, Saeimys i vaļdeibys, Latgolys pošvaļdeibu, navaļstiskuo sektora i garīdznīceibys puorstuovi.
Itai reizei pīstuov etniskys lītys: taututārps i Latgolys karūgs. Izmontoj vareibu aplīcynuot sovu pīdereibu Latgolai, esi Latgolys kongresa dīnys vydā!
Pasuokumu reikoj Latgolys kongresa lāmumu izpiļdis padūme, Latgalīšu kulturys bīdreiba, bīdreiba „Kroma kolna bruoliste” sadarbeibā ar Rēzeknis nūvoda, Rēzeknis vaļstspiļsātys pošvaļdeibom, Latgolys planavuošonys regionu.
Vaira informacejai: 26451355
PROGRAMMA
22. apreļs – Atkluotuo lekceja
22.04.2025. 16:30 Agris Bitāns, LU lektors, vadeis attuolynuoti lekceju “Latgalīšu volūdys tīsiskais statuss”
Dasaslēgt TEAMS itamā saitē: Join the meeting now
25. apreļs – Nūvodvuiceibys stuņdis
25.04.2025. sevkur pasaulē i Latvejā nūvodvuiceibys stuņdis attuolynuoti
Nūvodvuiceiba kūpā ar:
Daci Tihovsku “Skaņu pasauļs” PYRMSŠKOLAI I SUOKUMŠKOLAI (8:30–9:00)
fotografu i nūvodpietnīku Igoru Pliču par fotografiešonys viesturi Latgolā i Juoni Gleizdu PAMATŠKOLAI I VYDSŠKOLAI (9:05–9:35)
žurnalisti i školuotuoju Eviku Muiznieci VYDSŠKOLAI par boltajim plankumim Latgolys viesturē i Latgolys kongresa dīnu (9:40–10:10)
Verīs @Latgolyskongress.lv Youtube ci Latgalīšu kulturys bīdreibys FB!
26. apreļs – 25. atkluotuos latgalīšu rokstu volūdys i kulturviesturis olimpiade i skotuvis runys konkurss „Vuolyudzāni”
Vīta: Rēzeknis Vaļsts 1. gimnazeja, Dzirnavu 3a
Olimpiadis daleibnīki: vyspuorizgleitojūšūs školu 10.–12. klašu komandys 3–5 školānu sastuovā; skotuvis konkursā individuala daleiba vysūs školānu vacuma pūsmūs.
- Olimpiadis organizātuoji: Vaļsts izgleiteibys satura centrs, Latgalīšu volūdys, literaturys i kulturviesturis školuotuoju asociaceja (LVLKŠA), Rēzeknis Tehnologeju akademejis Regionalistikys zynuotniskais instituts, Latgalīšu kulturys bīdreiba, LU Humanitarūs zynuotņu fakultatis Baltu volūdnīceibys katedra, Rēzeknis nūvoda pošvaļdeiba, Rēzeknis Vaļsts 1. gimnazeja.
27. apreļs
10.00–14.00 patriotiska izalauzšonys spēle dobā “Kroma kolna boguoteibys” vydsškolānim (Kroma kolns, Ondrupinis pog., Kruoslovys nūvods)
15.00–15.30 pīminis šaļteņa pi pīminis vītys “Latgolys kongresam – 100” (Atbreivuošonys alejā 61)
Aicynuoti zīdu nūlikšonai i 3 minušu uzrunai: Vaļsts prezidents, Saeimys prezideja prīšksādātuoja, Ministru prezidente, NBS komandirs, Vaļsts rūbežsardzis prīkšnīks i Rēzeknis Pagaidu administracejis vadeituoja, Rēzeknis-Aglyunys diacezis veiskups (TBC)
Aicynuoti daleibai: Saeimys frakceju vadeituoji ci puorstuovi, Latgolys planavuošonys regions, piļsātu i nūvodu vadeituoji, medeji, Bazneicys puorstuovi.
Pīsadola Tihovsku saime.
15.30 – guojīņs nu pīminis vītys “Latgolys kongresam – 100” da pīminekļa “Vīnuoti Latvejai”.
15.40 – zīdu nūlikšona pi vysom ar latgalīšu kulturys viesturi saisteitajom viesturis personeibom i juos pīminis vītom: F. Trasuns, N. Rancāns, V. Seile (pi sātys), F. Kemps (pi dūmis), V. Luocs, M. Bukšs, O. Kūkuojs
15.40–16.10 izalauzšonys spēlis daleibnīku apbalvuošona i Zemissardzis 3. Latgolys brigadis 32. kuojinīku bataljona muoceibu nūslāgums.
Pīsadola veiru kūrs “Graidi” (muokslinīcyskais vadeituojs J. Mežinskis, dirigents E. Kārklinieks, vokala konsultante D. Kārkliniece)
Piec pasuokuma pušdīnis i naformaluos sarunys aicynuotajim runuotuojim.
