Nikodema Rancāna konkursam ir dasaceiti 14 pretendenti nu Rēzeknis piļsātys i nūvoda, Bolvu, Kruoslovys i Preiļu nūvoda. Nūslāguma pasuokums nūtiks 23. septembrī 15.00 stuņdēs, nūslādzūt Latgolys storpkongresu i īsuocūt Školuotuoju dīnys svineibys i gūdynūt vīnu nu izcyluokūs školuotuoju N. Rancānu i juo konkursam pīsaceitūs dalinīkus.
N. Rancāna bolvai ir dasaceiti 14 pretendenti nu pīcu Latgolys pošvaļdeibu. Juosoka, pretendenti puorstuov divys pamata nominacejis: par īguļdejumu un sasnāgumim latgalīšu volūdys, kulturviesturis un nūvoda vuiceibys īvīsšonā un īdzeivynuošonā školā i par radūšu i psihologiski atbolstūšu pīeju muoceibu ci studeju vidē. Var nūvāruot, ka Dzīšmu svātku gods ir ītekmiejs ari dasacejumu raksteituojus: puse nu konkursa školuotuoju ir saisteiti ar muzyku i pošaizlīdzeigu, radūšu davumu taišni itamā jūmā. Leidziegi kai paguojušajā godā divuos nominacejuos nav pīteikti školuotuoji, taidā veidā paruodūt, ka pyrmsškolā i augstuokajā, ari profesionalajā izgleiteibā latgalīšu volūdys, literaturys i kulturviesturis vaicuojumi prosa spieceiguoku viereibu i finansejumu. Prīcej, ka divi dasacejumi itūgod ir raksteiti latgalīšu volūdā i vairuoku školuotuoju aprokstūs pasaruoda teksts, ka vuica latgalīšu volūdu.
Nūslāguma pasuokums nūtiks 23. septembrī 15.00 stuņdēs Rēzeknis Tehnologeju akademejā. Iz pasuokumu gaideiti kai pretendentu izvierzietuoji, tai jūs atbaļsteituoji, poši konkursa daleibnīki, kai ari īprīškejūs godu nominanti i sadarbeibys partneri. Ir breineiga vareiba pīdzeivuot veiru kora “Graidi” (muokslinīcyskais vadeituojs J. Mežinskis, dirigents E. Kārklinieks) koncertu, kas ļaus iz šaļteņu atsagrīzt Dzīšmu svātku nūskaņuos i baudeit koru karu uzvarātuoja snīgumu. Naizpaliks ari sirsneigys sarunys i otkon redziešonuos prīca pi čaja.
Konkursu organizej Latgalīšu kulturys bīdreiba sadarbeibā ar Ludzys, Preiļu, Rēzeknis, Bolvu i Kruoslovys nūvoda pošvaļdeibu. Konkurss ļaun izceļt i gūdynuot lobuokūs nūzaris pedagogus, ceļūt školuotuoja profesejis prestižu sabīdreibā i atguodynojūt, cik svareiga lūma puormaiņu procesā ir izgleiteibai.
Konkursa nūslāgums ir daļa nu projekta” Latgalīšu kūpīnys lidereibys i pīdereibys styprynuošona, eistynojūt Latgolys kongresa idejis”, kū finansiali atbolsta Sabīdreibys integracejis fonds nu Kulturys ministrejis dūtajim Latvejis vaļsts budžeta leidzeklim. Informativais atbolsts – “Vietējā Latgales avīze”, Latgalīšu kulturys ziņu portals lakuga.lv, Rēzeknis Tehnologeju akademeja.
Ilga Šuplinska, Latgalīšu kulturys bīdreibys vadeituoja
