3. novembrī 14.00 Rībeņu vydsškolā tiks atkluota izstuode “Sūpluok – dzymtu stuosti”, kas izveiduota pusaudžu i jaunīšu nūmetnē “Sūpluok” Latgalīšu kulturys bīdreibys (LKB) projektā “Dzymtu stuosti multikulturalajā Latgolā i latgalīšu volūdā” ar Eiropys Savīneibys MARIO programys atbolstu.
Kai atzeist nūvodvuiceibys školuotuoja, tān ari Rībeņu školys direktoris pīnuokumu piļdeituoja Diāna Bravacka: “Tī byus nūvodvuiceibys svātki. Vīnā reizē raudzeisim aptvert daudzus latgaliskuma kodus.”
Itamā reizē bez pošys izstuodis byus ari sasatikšona ar dzejneicu Dagneju (Dagneju Dudarjonoku), kurai itūgod izdūts kruojums “Ups, kūki i mes”, kai ari interaktīva nūdarbeiba školuotuojim, izstuostūt i paraugūt dažus aizdavumus, kab dzymtu stuosti pasaruodeitu ari školys vidē.
Izstuodi veidoj nūmetnis daleibnīku stuostejums par sovu dzymtu, kas atsakluoj kai: ilustrātys meiluokuos dzīsmis; volūdu CV, kur var redzēt, ka sevkurā dzymtā runoj vaira par vīnu volūdu; vuorda pieteišonys kartis – ar statistiku i etimologeju, uzvuorda izplateibu; dzymtys spāka logo kaidā latvīšu roksta zeimē i augā, viesturis asociativuo spēle ar sūpluokīšu pīsadaleišonu; kartis, kurā izceļuojom sovus ci sovu rodu migracejis ceļus, vierteibys – atslāga vuordi – dzymtai, saimei, byušonai sūpluok; receptis, kū babeņa pastuosteja i gatavojom ari tān; pa kaidai lītai ci foto, ka beja vareiba tū atguoduot, kai ari vacuoku viertejumi i atzinis par sovu saimi i ideņtitai.
Izstuodis atkluošonā jaunīšim teik pīduovuota izzynūša spēle, kurā īrūbežuotā laikā juoatrūn napīcīšamuo informaceja, fakts piec dūtom “dainu skapa” koordinatem. Spēle, kai ari dažaidī CV materiāli ir dūti īrūsmei, kab školuotuoji leidzeigā formatā varātu struoduot ari dažaidu prīškamtu stuņdēs. Tys paleidz jaunīšim saprast, kaida ir juo ideņtitati, cik daudz tū ītekmej juo vuords, uzvuords, izceļsme, runuotuos volūdys saimē i tradicejis.
Ilga Šuplinska, LKB vadeituoja, projekta koordinatore
