2. junī Lūznovys muižā nūtyka Latgolys Turisma forums, kurā regiona nūzaris daleibnīki dalejuos pīredzē, diskuteja par nūzaris tendencem i apgiva praktiskys marketinga īmanis turisma biznesa atteisteibai. Pasuokuma mierkis beja kluotīnē īsapazeit ar nūvodu specialistim, kuri atbiļd par vysaidu turisma objektu atteisteibu regionā, kai ari sevkuram dalinīkam apzynuot sovu vareibu biznesa moderniziešonai.
Pasuokumā par kūpeigū Pūlejis – Latvejis viesturi i potencialu turismam stuosteja Pūlejis viestneica Monika Mihališina, par nūzaris tendencem diskuteja Aivars Mackevičs, Jeļena Kijaško, Aija Van der Steina, Ilga Šuplinska i Edgars Bondars, a LIAA puorstuove Inga Maļina raksturuoja vaļsts atbolsta īspiejis turisma nūzarei. Taipat kluotasūšī varēja apgiut praktiskys marketinga īmanis biznesa atteisteibai, par tū pasaryupeja marketinga specialisti – Sindija Bokāne i Raimonds Platacis.
Pūlejis viestneica Monika Mihališina saceja, ka Latgolys turisms, pasateicūt kopejai viesturei, varātu byut par saistūšu gola mierķi Pūlejis dzeivuotuojim. Latgolā ir sastūpamys daudzys pīminis vītys Pūļu–zvīdru karam (1600–1629), kai ari pūļu muižys i tūs teritorejis ,katuoļu bazneicys, senejis kopavītys, līceibys par Atbreivuošonys ceiņom Latgolā. Itaidus apskatis objektus vajag padareit daejamuokus pūļu turistam. Pūlejis viestneica nūruodeja iz konkretom darbeibom sadarbeibys atteisteibai turisma sferā.
Diskusejā par turisma nūzaris izaicynuojumim, daleibnīki uzsvēre, ka sevkuram nu jau asūšajim objektim vaira juodūmoj par “zeimulvedeibu”, sova unikaluo stuosta veiduošonu, kab nūdrūšynuotu jūs atpazeistameibu. Jau tān dominej cytu regionu pījāmums, ka “Latgola ir tuoli”, tok faktiski taipoš kai cytu regionu, ari Latgolys turisma objekti ir daejami. Tū var attīcynuot kai iz cytu nūvodu dzeivuotuojim, tai iz Baltejis I Eiropys vaļstu turistim, kuri meklej viesturiskys līceibys. Kai Latgolys turisma potencials tyka nūsaukts etniskais turisms, holokausta i cytu tymsuo – visturiski mozuok zynomuo – turisma līceibys.
Paši foruma daleibnīki par veiksmeiguokajim Latgolys turisma objektim sauc – Latgolys viestnīceibu “Gors”, Rotko centru, Aglyunys baziliku i Lūznovys muižu.
Pasuokums apsaverams: https://www.youtube.com/watch?v=GAjGd4NHxuM&t=3143s, https://www.youtube.com/watch?v=NfOzHbBuOT4&t=9s
Nuokušais pasuokums nūtiks jau 25. augustā (tīšsaistē) , tys byus veļteits aktualim izgleiteibys vaicuojumim.
Foto: Dagnija Bernāne https://failiem.lv/u/y7q38upak
Projekts teik eistynuots, realizejūt Latgolys kongresa rezoluceju, izgleitojūt sabīdreibu pilsūniskuos leidzdaleibys vaicuojumūs i uzturūt kūpdarbeibys aktivitatis vysaidu nūzaru grupuos. 2023. godā ir plānuoti 2 kluotīnis i 5 tīšsaistis pasuokumi, kas byus veļteiti vysaidom Latgolys kongresa rezolucejis temom: izgleiteiba, uzjiemiejdarbeibys atteisteiba, drūšeiba. Sevkurā pasuokumā pīsadaleis atbylstušuos jūmys puorstuovi Latgolys regionā. Kab veicynuotu teiklūšonūs i sadarbeibys veiduošonu, foruma daleibai aicynuoti nūvodu aktivuokī izgleiteibys, kulturys īstuožu, NVO i pošvaļdeibys īstuožu puorstuovi.
Pasuokumu organizej: Latgalīšu kulturys bīdreiba, Rēzeknis nūvoda pošvaļdeiba i Latgolys kongresa lāmumu izpiļdis padūme.
Projektu” Latgalīšu kūpīnys lidereibys i pīdereibys styprynuošona, eistynojūt Latgolys kongresa idejis” finansiali atbolsta Sabīdreibys integracejis fonds nu Kulturys ministrejis dūtajim Latvejis vaļsts budžeta leidzeklim. Projekts teik realizāts nu 03.04.2022. da 31.10.2024.
