Latgolys kongresa lāmumu izpiļdis padūme (LKLIP), gaidūt 14. Saeimys vieliešonys, ir izstruodujuse memorandu, kas paredz politiskūs spāku apsajimšonu Latgolys i latgalīšu volūdys vaicuojumu rysynuošonā, paruodūt sevkura politiskuo spāka gataveibu īsasaisteit regiona izaugsmē. 2022. goda 21. septembrī 16.00 stuņdēs LKLIP prīšksādātuojs Agris Bitāns informēs sabīdreibu par tū, kuri politiskī spāki ir apsajāmuši eistynuot Latgolys kongresa idejis.
2022. goda 27.–29. aprelī Rēzeknē nūtyka Latgolys kongress “Latgaliskuma kods Eiropā: nu volūdys da ekonomikai”, kas pulcēja vairuok par 100 ekspertu zynuotniski lītišķajuos diskusejuos. Kongresam kūpumā kluotīnē beja registrejušīs 343 delegatu, vīsu i klauseituoju. Kongress nūsaslādze ar rezolucejis pījimšonu.
LKLIP ir prezentejuse Latgolys kongresa rezolucejis idejis Saeimā, puorrunuojuse ar politiskajim spākim i aicynuojuse juos īkļaut parteju programuos, izceļūt, ka atteisteiba regionūs nasasnīdz golvyspiļsātys i Eiropys videjūs ruodeituoju leimeni, nūvuojinuotuo ekonomika i saspryngtuo geopolitiskuo situaceja naļaun Latgolys īdzeivuotuojim justīs puorlīcynuotim par cylvāku lobkluojeibu i regiona atteisteibu nuokūtnē.
Memorandā sevkurs politiskais spāks var paredzēt sovu davumu Latgolys regiona i latgalīšu volūdys atteisteibai. Itū šaļti vairuokys politiskuos partejis ir parakstejušys voi gotovys paraksteit sadarbeibys memorandu.
21. septembrī 16.00 stuņdēs LKLIP reikoj presis konfereņci, kurā informēs par sadarbeibu ar politiskajom partejom Latgolys kongresa lāmumu eistynuošonā.
Presis konfereņce nūtiks Reigā, Luočplieša īlā 20a (6. stuovā) i tīšsaistē. Tīšsaistis adress tiks izsyuteits interesentim. Papyldvaicuojumi i adresu pīteikšona: info@latgaleskongress.lv ci 26451355.
Agris Bitāns, Latgolys kongresa lāmumu izpiļdis padūmis (LKLIP) prīšksādātuojs
