Ir nūskaidruoti Nikodema Rancāna konkursa uzvarātuoji: Ligita Spridzāne (Baļtinovys vydsškola), Natālija Garā (Ruguoju vydsškola), Aivars Vilkaste (Austrumlatvejis Tehnologeju vydsškola), Marija Mickeviča (Kruoslovys Varaveiksnis vydsškola), Gunta Blauma (Bolvu suokumškola) i Sandra Juste (Rēzeknis suokumškola). Specialuos bolvys īgivieja – Daina Pužule (Rekovys vydsškola).
Nūslāguma pasuokums nūtyka 25. septembrī Bolvūs, tymā pīsadaleja daleibnīki i jūs atbaļsteituoji nu Rēzeknis piļsātys i nūvoda, Bolvu, Kruoslovys nūvoda i Daugovpiļs. Sevkurs runuotuojs izcēle školuotuoja profesejis nūzeimeibu i prestižu, saceja pateiceibys vuordus školuotuoju saimei kūpumā, partū ka N. Rancāna konkursa nūslāgums īvoda ari Školuotuoju dīnys pasuokumus. Juopīzeist, ka ari školuotuoji, kas kūpejā pasauļa i Latvejis nūtykumu straumē jiutās saguruši, sovuos uzrunuos saglobuoja syltumu i pateiceibu bārnim, vacuokim, vītai i laikam, ka jī ir klivuši par školuotuojim i var dareit itū gryutū i pasauļa vierzīni ītekmejušū dorbu.
N. Rancāna bolvu – sudobra pokovsaktu (autors Rihards Ciblis) – nominacejā par īguļdejumu i sasnāgumim latgalīšu volūdys, kulturviesturis i nūvoda vuiceibys īvīsšonā i īdzeivynuošonā školā īgyva Ligita Spridzāne (Baļtinovys vydsškola) i Natālija Garā (Ruguoju vydsškola), atzineibys – Inga Stafecka (Viļānu vydsškola), Inta Nagla (Natrānu vydsškola) i Daina Pužule (Rekavys vydsškola). Daina Pužule īgyva ari Latgolys Etnografiskuos viestnīceibys specialū bolvu – etnogrāfiskuos drēbuos leli, kū ir darynuojuse Iveta Seimanova, aplīcynuot, ka ari turpmuok atbaļsteis konkursu izcyluokajim Latgolys školuotuojim.
Kai sovā uzrunā saceja I. Seimanova: “Itei ir 57. lele, kas iztaiseita vysaidim labdareibys projektim. Munys tautu meitys dzeivoj pa vysu pasauli – nu Rēzeknis da Reigys, nu Londonys da Adelaidys. Bet itei dzeivuos Rekavā pi školuotuojis, kas vuica bārnim ari tautu tārpa nosuošonys kulturu. Vuica, ka meitinem pi tautu tārpa juosapyn bizis, a puiši bez capuris navar kuopt iz skotuvis. Sylajuoņu Iļža, Madalis muosa, dzeivuos pi Dainys Pužulis.”
Der atguodynuot, ka Latgolys kongresa 2022 laikā piec Nikodema Rancāna tāluojuma “Ceļuojums pa Latgolu” tyka atruodeita Madaļa i Jezups, i vēļ ap 40 “kongresmenem” latgalīšu etnografiskajuos drēbēs.
Nominacejā par radūšu i psihologiski atbolstūšu pīeju vuiceibu vidē tyka gūdynuoti izgleiteibys īstuožu vadeituoji: Aivars Vilkaste (Austrumlatvejis Tehnologeju vydsškola) i Marija Mickeviča (Kruoslovys Vareiksnis vydsškola). Taipoš sudroba pakovsakta tyka padūta Guntai Blaumai (Bolvu suokumškola) i Sandrai Justei (Rēzeknis suokumškola). Atzineibys itamā nominacejā sajēme ari Juoņs Tukāns (Kruoslovys gimnazeja), Anita Ludbuorža (Nautrānu vydsškola), Anita Tukāne (Kruoslovys gimnazeja), Juris Ozols (Latgolys Industrialais tehnikums) i Anna Sondore (Dekšāru pamatškola).
Sirsneiguo i pateiceibys vuordim boguotuo nūslāguma ceremoneja ir apsaverama sevkuram Bolvu pošvaļdeibys Youtube kontā
Konkursu organizej Latgalīšu kulturys bīdreiba sadarbeibā ar Latgolys Planavuošonys regionu i Bolvu nūvoda pošvaļdeibu. Konkurss ļaun izceļt i gūdynuot lobuokūs nūzaris pedagogus, ceļūt školuotuoja profesejis prestižu sabīdreibā i atguodynojūt, cik svareiga lūma puormaiņu procesā ir izgleiteibai.
Konkursu finansiali atbolsta Latgolys Planavuošonys regions, Bolvu nūvoda pošvaļdeiba, z/s “Kotiņi”, Latgolys Etnografiskuo viestnīceiba, Maltys muzejs, Annele Slišāne, informativi – “Vietējā Latgales Avīze”, Latgalīšu kulturys ziņu portals lakuga.lv, Latvejis Radio Latgolys studeja. Eipašs paļdis Latgolys regionalajai televizejai.
Ilga Šuplinska, Latgalīšu kulturys bīdreibys vadeituoja
