17. junī nu 11:00 da 16:00 stuņžu Rēzeknis nūvoda dūmē tiks organizāts „Esi i dori” kluotīnis forums „Vaļsts i pošvaļdeibu sadarbeiba ar NVO”, kurā pārrunuos aktualuokūs vaicuojumus, kas skar Latgolys atteisteibu i kurūs sadarbeiba storp piļsūniskajom organizacejom i vaļsts i pošvaļdeibu ir styprynoma:
- Austrumu pīrūbežys reiceibys plana konceptu, kurā jūprūjom nav radzami konkreti rezultativī ruodeituoji i finanšu apjūms, kai ari projektu realizacejis laiks, kab vysmoz īsuoktu celi iz ekonomiskuos i socialuos navīnleidzeibys mazynuošonu.
- Pošvaļdeibu finansiešonys izmainis, izdzeivuošonys režimi pošvaļdeibuos, kai piļsūniskuos organizacejis var īsasaisteit nūteiktu vaicuojumu rysynuošonā.
- Pošvaļdeibu sadarbeiba ar piļsūniskajom organizacejom, t. sk., nūteiktu funkceju delegiešona, Īdzeivuotuoju padūmu veiduošona i c.
- Pošvaļdeibu īsaiste Latgolys kongresa rezolucejis eistynuošonā: latgalīšu volūdys īvīsšona školuos, pasuokumu nūrisē, lingvistiskajā ainovā, Latgolys kai viesturiskuos zemis vīnuoteibys principa saglobuošona, informativuos telpys sakuortuošona i c.
- Kūpeiga īsastuošona par eipašy ES programys, kas styprynuotu drūšeibys, sabīdreibys i informativuos telpys nūtureibu itamā geopolitiskajā situacejā, juos aizstuoviešonys napīcīšameibu ES leimenī. (2023. goda pavasarī VARAM rīkoja storptautysku seminaru, kurā vysys vaļsts, kas rūbežojās ar agresorvaļstim pīkryta taidys programys izveidei i snīgšonai ES Padūmē, tymā pošā laikā konkreta juos vierzeiba ir apsastuojuse).
Foruma programa tyvuokajā laikā tiks publicāta Latgolys kongresa sātyslopā. Iz pasuokumu ir aicynuoti, pošvaļdeibu vadeituoji, kulturis, izgleiteibys jūmys atbiļdeigī cylvāki, NVO i medeju puorstuovi, kai ari interesenti. Lyudzam īprīšk pīsaregistrēt ite: https://forms.gle/vUDLpeWmbtkEZuSU8
Foruma tīšraide byus Latgolys kongresa Youtube kanalā @latgolyskongress.
Latgolys kongresa lāmumu izpiļdis padūme (LKLIP) sadarbeibā ar Latgalīšu kulturys bīdreibu 2023./ 2024.godā reikoj kluotīnis i virtualuos vidis forumus, kurūs izgleitoj sabīdreibu dažaiduos jūmuos, rūsynūt vītejuos i vaļsts atbiļdeigūs instituceju īsaisti Latgolys regiona atteisteibys vaicuojumu rysynuošonā, prioritari dūmojūt par ekonomiskuos i socialuos navīnleidzeibys mazynuošonu, drūšeibys i pīdereibys styprynuošonu.
Vaicuojumim: 26451355
Projektu” Latgalīšu kūpīnys lidereibys i pīdereibys styprynuošona, eistynojūt Latgolys kongresa idejis” finansiali atbolsta Sabīdreibys integracejis fonds nu Kulturys ministrejis dūtajim Latvejis vaļsts budžeta leidzeklim. Projekts teik realizāts nu 03.04.2022. da 31.10.2024.
