Sagaidūt latgalīšu volūdys latiņu drukys aizlīguma atcelšonu, kai ari Latgolys kongresa dīnu, tiks reikuoti vairuoki pasuokumi, t. sk. “Esi i dori” Latgalīšu volūdys forums Varakļuonu Nūvoda muzejā 19. aprelī, nūvodvuiceibys stuņdis attuolynuoti kotram školys vacumpūsmam, kai ari diskuseja “Latgalīšu volūda medejūs” Latvejis Nacionalajā bibliotekā i tiešsaistē 26. aprelī. Pasuokumā var pīsadaleit sevkurs interesents kluotīnē voi tīšsaistē Latgolys kongresa sātyslopā.
23. aprelī 1904. godā tyka panuokts, ka atceļ latiņu drukys aizlīgumu Vitebskys guberņā, kur tūlaik beja Latgola. 26.–27. aprelī 1917. godā Rēzeknē nūtyka Latgolys kongress, kas pyrmū reizi aktualizieja ideju par sovys vaļsts izveiduošonu i pījēme lāmumu, ka Latgola ir gotova apsavīnuot ar Vydzemi i Kūrzemi, veidojūt Latvejis vaļsti. Latvejis vaļsts ideja pyrmū reizi izskaņ tīši Latgolys kongresā.
Foruma pamatideja – atkuortoti izgleituot par latgalīšu volūdys statusa i funkcionalitatis vaicuojumim, atsavērt iz padareitū gruomatnīceibā i digitalajūs resursūs 120 godu nu drukys aizlīguma atceļšonys, aktualizēt latgalīšu volūdys dzeivuotspieju, raksturojūt taišni Varakļuonu kulturtelpu, i diskutēt par īrūbežuojumim, kas vystik naļaun latgalīšu volūdai atguit sovu dabiskū atteisteibys gaitu izgleiteibys i mediju sferā.
Forumā Latgolys kongresa lāmumu izpiļdis padūmis prīšksādātuojs Agris Bitāns stuosteis par aktualajim latgalīšu volūdys vaicuojumim nu juridiskuo aspekta, sovutīs literaturzynuotnīki, rakstnīki, Vaļsts volūdys centra lingvisti pīsadaleis diskusejā par padareitū i vēļ doramū latgalīšu volūdys kūpšonā 120 godu nu latiņu drukys aizlīguma atceļšonys. Byutiski, ka pasuokums nūtiks Varakļuonūs i kluotīnē nūtiks diskuseja par latgalīšu volūdys dzeivuotspieju, analizejūt taišni situaceju Varakļuonūs. Tū vadeis Latvīšu viesturiskūs zemu atteisteibys padūmis puorstuovs Dainis Mjartāns.
Piļneiguoku pasuokuma programu var apsavērt zamuok. Interesenti i daleibnīki ir aicynuoti pīsaregistrēt 19. apreļa kluotīnis pasuokumam ite: https://forms.gle/mETY41SLr6Dxrgua8
Nedeļu nu kluotīnis foruma, turpynūt īsuoktū tematu, 26. apreli 8:15 suoksim ar 3 attuolynuotom nūvodvuiceibys stuņdem: pyrmuo – školuotuojim (par daejamajim digitalajim resursim latgalīšu volūdys i nūvodvuiceibys apgivē), ūtruo – pymsškolys i suokumškolys školānim par vīnu nu jaukuokajim kūpprojektim dzejā i muzykā “Vušķeņa iz pļovys”, a trešuo – pamatškolys i vydsškolys vacuma školānim. Tymā vaira tiks izcalta Latgolys kongresa dīnys nūzeime. Attuolynuotajom vuiceibom nav juosaregistrej, tuos varēs vērtīs tīšsaistē i piečuok īrokstā. Školuotuoji ir aicynuoti izmantuot video ari sovuos stuņdēs. Stuņdis vadeis sabīdreibā pazeistami cylvāki, latgalīšu volūdys kūpieji: literaturzynuotneica Ilga Šuplinska runuos ar školuotuojim, dzejneica Ilze Sperga sūpluok ar muziki Kristapu Rasimu prīcēs suokumškolys bārnus, bet īsavērt romanā “Bruoli” i apjaust latgaliskuos vierteibys varēs kūpā ar rakstnīku Aldi Bukšu.
26. aprelī 10:00 stuņdēs Latvejis Nacionalajā bibliotekā i tīšsaistē byus diskuseja “Latgalīšu volūda medejūs”. Kluotīnis daleibai tiks aicynuoti žurnalisti, medeju puorstuovi, eksperti bet attuolynuoti pasuokumā varēs pīsadaleit i vaicuojumus uzdūt sevkurs interesents. Vaira informacejis par itū pasuokumu sekuos.
Pasuokumu organizej: Latgalīšu kulturys bīdreiba, LBTU Malnovys koledža i Latgolys kongresa lāmumu izpiļdis padūme (LKLIP) sadarbeibā ar Latvejis Nacionalū biblioteku.
Projektu” Latgalīšu kūpīnys lidereibys i pīdereibys styprynuošona, eistynojūt Latgolys kongresa idejis” finansiali atbolsta Sabīdreibys integracejis fonds nu Kulturys ministrejis dūtajim Latvejis vaļsts budžeta leidzeklim. Projekts teik realizāts nu 03.04.2022. da 31.10.2024.
Ilga Šuplinska,
projekta koordinatore, LKB vadeituoja
