9. janvarī LKLIP puorstuovi pīsadaleja Latgolys apakškomisejis sēdē i sasatyka ar parteju apvīneibys „Jaunuo Vīnuoteiba” bīdrim. LKLIP puorstuovēja: Agris Bitāns, Sergejs Maksimovs, Ilga Šuplinska i Imants Slišāns. Parteju apvīneibu „JV”: izgleteibys i zynuotnis minister Anda Čakša, īšklītu ministrs Rihards Kozlovskis, VARAM, IZM i Ministru prezidentis parlamentarī sekretari, Saeimys deputati.
Pyrms 14. Saeimys vieliešonom LKLIP slēdze sadarbeibys memorandus ar vairuokom partejom par Latgolys atteisteibai svareigu vaicuojumu rysynuošonu. Nu Saeimys vieliešonu ir paguojs vaira kai gods, ir pasamainejuse vaļdeiba, partū raudzejom nūskaidruot, kas i cik dreizā laikā varātu pasamaineit Latgolys vaicuojumūs.
Apsprīžamūs vaicuojumu lūks beja plašs, tok gon Latgolys apakškomisejā, gon parteju apvīneibā „JV” tyka runuots par „Reiceibys planu Latvejis Austrumu pīrūbežys ekonomiskajai izaugsmei 2024.–2026. godam”. Eistineibā, tik lela nagataveiba nu pošu izstruoduotuoju i ministreju pušu, seņ nav radzāta. Dokuments ir apsaverams sevkuram interesentam (https://tapportals.mk.gov.lv/legal_acts/e68896ff-d578-4ee2-942d-e5f38dfe1375) i tam beja juosuok struoduot jau nu 2023. goda janvara, tok vēļ tān nav skaidri sasnīdzamī rezultati, finanšu apjūms i termini. Var tikai cerēt, ka deputati, kas īvālāti nu Latgolys, aktivi īsasaisteis dokumenta preciziešonā i dreizuokā īdarbynuošonā juo realizacejai.
VARAM kompetenču lūkā ir ari Rēzeknis vaļstspiļsātys krīzis rysynuošona i jau medeju telpā izskanejušais Varakļuonu vaicuojums.
Par Rēzeknis puorvaļdis vaicuojumu kluotasūšī ministrejis puorstuovi nūruodeja, ka sekoj itai situacejai i dareis vysu, kas ir veicams, kab piļsātys atteisteiba i finanšu stuovūkļs stabilizātūs. Tymā pošā laikā juosaprūt, ka zynoma atbiļdeiba ir ari Latgolys sabīdreibai, kas vysai attureigi īsasaista puorvaļdis i cytu vaicuojumu rysynuošonā. Īdzeivuotuoju padūmis ir vīns nu sūļu, tok, juopīzeist, ka ari Rēzeknis vaļstspiļsāta nasasteidz ar taida instrumenta izveidi.
Varakļuonu vaicuojums, kas otkon byus dīnys kuorteibā, naļaun pīsavierst ekonomiskūs i socialūs vaicuojumu rysynuojumam, kas Latgolai ir akuti. Tymā pošā laikā Varakļuonu nūvoda dūmis i atbiļdeiguos ministrejis Latvīšu viesturiskūs zemu lykuma ignoriešona, ruoda, ka attīksmis maiņa par latgaliskū kulturtelpu i viesturiskū apziņu nūteik puoruok lānai. Itymā gadīnī teik stuosteits par Varakļuonūs nūtykušū aptauji (kas taitod ir augstuok viertejama kai lykums!), tok Saeima i MK ir dūmuoti, kab vārtūs nu valstiskuma prizmys. Ite ir skaidri radzams, ka taidā veidā Latgolys interesis vaļsts puorvaļdē vēļ vaira sasamazynuos, partū ka sasamazynoj puorstuovnīceiba i dzeivuotuoju skaits regionā. I itys ir drūšeibys vaicuojums, kū vysu laiku politiki skandynoj, tok navalta tam ni pīteikamu viereibu, ni resursus. LKLIP rūsynuojums beja meklēt kompromisu i, ka sovaižuok navar, atstuot Varakļuonus kai atsevišķu Latgolys regiona nūvodu.
Kluotasūšuo izgleiteibys i zynuotnis ministre Anda Čakša i juos parlamentaruo sekretare Silvija Reinberga aplīcynuoja, ka nu 2024.goda janvara vysu kalendarū godu 46 Latgolys školys sajem mierkātu fiansiejumu latgalīšu volūdys ci nūvodvuiceibys vuiciešonai, kai ari ka cytys školys, kas tū nav izdarejušys, var pīsateikt itaidam finansiejumam sevkurā laikā.
Taipoš IZM puorstuovis aplīcynuoja, ka kūpā ar VARAM kolegim kuortejū reizi apbrauokoj pošvaļdeibys, lai panuoktu optimalus rysynuojumus školu teikla sakuortuošonai i izgleiteibys kvalitatis uzlabuošonai. Baļtinovys vydsškolys direktors Imants Slišāns atkuortuoti aktualizēja vaicuojumu par pīrūbežys školu eipašajim kriterijim, kas ītvarti sagatavuotajā informativajā ziņuojumā par jaunū školu finansiešonys kuorteibu.
Atguodynuojumam, ka pīrūbežys statuss atsatīc iż vysu Bolvu, Ludzys, Kruoslovys, 8 pogostim Rēzeknis nūvodā, Aglyunys pogostu Preiļu nūvodā i daļu Augšdaugovys nūvoda. Tys ir byutisks vaicuojums školu pīejameibai Latgolys lauku teritorejuos i pīrūbežys atteisteibys centrūs.
Kluotasūšais īšklītu ministrs Rihards Kozlovskis apstyprynuoja, ka vaļdeibys prioritate ir drūšeibys vaicuojums i rūbežis kvalitativa izbyuve nūruodeitajūs termiņūs. Taipoš sajēmem aplīcynuojumu, ka īšklītu ministrs 16. februarī plānuos daleibu Latgalīšu kulturys bīdreibys reikuotajuos „Politiskajuos patmaļuos” (Rēzeknē, Atbreivuošonys alejā 80, ari tīšsaistē).
LKLIP turpynuos sarunys ar Saeimā īvālātajim politiskajim spākim par aktualūs Latgolys vaicuojumu rysynuošonu.
