2022. goda 26. septembrī (piec vacuo kalendara – 13. septembrī) paīt 152 godi kai dzims izcylais katuoļu goreidznīks i pedagogs, Latgolys pyrmuos atmūdys darbinīks, monsinjors Nikodems Rancāns (1870–1933). Lai gūdynuotu juo īspaideigū davumu Latgolys kulturā i izgleiteibā, Latgalīšu kulturys bīdreiba (LKB) īdybynovuse Nikodema Rancāna bolvu Latgolys izcyluokajim pedagogim.
Pretendentu pīteikšona nu 29. augusta da 16. septembra.
N. Rancāna bolva teik daškierta reizi godā pyrmsškolys audzynuotuojim, vyspuorejuos i pamatizgleiteibys īstuožu školuotuojim, kai ari augstuokūs i videjūs profesionalūs vuiceibu īstuožu pedagogim par īguļdejumu vuiceibu dorbā, latgaliskuos kulturys i tradiceju īaudzynuošonā jaunajā paaudzē. Nominaceju skaits sevkuru godu ir nadaudz atškireigs, sekojūt aktualitatem izgleiteibys jūmā. Itamā reizē izsludynuotys ir 4 nominacejis, treis par latgaliskuo koda saglabuošonu i nūdūšonu jaunajai paaudzei, caturtuo – par radūšu i psihologiski atbalstūšu vuiceibu voi studeju procesa organiziešonu izgleiteibys īstuožu vadeituojim. Vaira var vērtīs konkursa nūlykumā.
Konkursu organizej LKB sadarbeibā ar Latgolys Planavuošonys regionu i Bolvu nūvoda pošvaļdeibu. Nūslāguma pasuokums nūtiks Bolvūs, 25. septembrī.
Konkurss ļaun izceļt i gūdynuot lobuokūs nūzaris pedagogus, ceļūt školuotuoja profesejis prestižu sabīdreibā i atguodynojūt, cik svareiga lūma puormaiņu procesā ir izgleiteibai.
Nikodema Rancāna bolvys NŪLYKUMS i DASACEJUMA VEIDLOPA:
Konkursa dasacejumu pījimšona nūteik da 16. septembra plkst. 24:00, aizpiļdeitu anketu syutit iz e-postu: latgalisubidreiba@gmail.com
Konkursu finansiali atbolsta Latgolys Planavuošonys regions, Bolvu nūvoda pošvaļdeiba, z/s “Kotiņi”, informativi – “Vietējā Latgales avīze”, Latgalīšu kulturys ziņu portals lakuga.lv, Latvejis Radio Latgolys studeja.
Ilga Šuplinska, LKB vadeituoja
