Dasasaceit kongresam var da 10. februara, iz 1. februari beja pīsasacejuši 80 delegatu i klauseituoju.
Kongresā ir paradzāta nūteikta delegatu puorstuovnīceiba nu pošvaļdeibu, piļsūniskūs organizaceju (aktiva darbeiba Latgolā i latgaliskajūs pasuokumūs pādejūs 5 godu laikā), izgleiteibys īstuožu (darbeiba latgalistikā pādejūs 5 godu laikā), uzjiemieju, Bazneicys, diasporys, pa vīnam delegatam nu latvīšu viesturyskūs zemu.
Leluokuo grupa ir nu dzeivuotuoju 115 delegatu proporcionali dzeivuotuoju skaitam (dzeivuotuoju registra dati iz 2021. goda 1. janvara): Aizkrauklis nūvods (Aivīkstis pogosta daļa i Pļaveņu piļsātys daļa) 1, Olyuksnys nūvoda Līpnys pogosts 1, Augšdaugovys nūvods 6, Bolvu nūvods 10, Daugovpiļs 20, Jākubpiļs nūvods 4, Jākubpiļs (Daugovys lobais krosts i Daugovsola) 2, Kruoslovys nūvods 10, Kruoslova 4, Leivuonu nūvods 6, Ludzys nūvods 10, Modūnis nūvods (Borkovys pogosts i Ūšupis pogosta daļa) 1, Preiļu nūvods 8, Rēzeknis nūvods 20, Rēzekne 10, Varakļuonu nūvods 2.
Aktivuok pīsasoka izgleiteibys īstuodis, kai ari dzeivuotuoji nu Rēzeknis vaļstspiļsātys i Bolvu nūvoda.
Kū sagaida nu Latgolys kongresa?
Vaicovom pyrmajai pīsasacejušai delegatei Rutai Cibulei (Bolvu Centraluos bibliotekys vadeituoja):
Nu Latgolys kongresa gaidu nūpītnu puorstuovnīceibu nu Latgolys sabīdreibys, tymā skaitā nu pošvaļdeibu, sasatikšonuos prīcu, padareitūs dorbu analizi i jaunu uzruovīni latgaliskūs vaicuojumu rysynuojumam!
Vīnam nu pyrmūs pīsasacejušūs jaunīšu Linardam Mundam (Rēzeknis vaļstspiļsātys dūmis jaunīšu komisejis sekretars):
Es kai jauns cylvāks, kam ryup Latgolys nuokūtne, grybu dūt sovu snīgumu Latgolys atteisteibā. Nu kongresa sagaidu, ka delegati vierzeis taidus prīšklykumus, kas veicynuos Latgolys izaugsmi.
Pyrmajam pīsasacejušam pošvaļdeibu puorstuovam Ārijam Vucānam (Preiļu nūvoda dūmis prīšksādātuojs):
Latgaliskums ir vierteiba Eiropā – nav šaubu. Tok myusim ari modernais eiropeiskums juoatvad iz Latgolu, lai nuokūtnis Latgola ir Eiropys i pasauļa mārūga ekonomiski atteisteita teritoreja, kas spiej tikt golā ar vacajom problemom, tikt leidza jaunajim izaicynujumim i byut koč drusku prīškā izaugsmis īspieju izmontuošonā.
Vysa aktualuo informaceja par Latgolys kongresu: latgolyskongress.lv
Paļdis par informativu atbolstu “Vietējā Latgales avīze”, Latgalīšu kulturys ziņu portalam lakuga.lv i Latvejis Radio Latgolys studejai!
