26. septembrī Rēzeknis Tehnologeju akademejā sešim izcylim Latgolys pedagogim tyka padūtys Nikodema Rancāna bolvys i četri školuotuoji tyka pi papyldbolvys.
Rēzeknis Latgalīšu kulturys bīdreiba Nikodema Rancāna bolvu Latgolys izcyluokajim pedagogim īdybynuoja i pyrmū reizi padeve 2015. godā, iz N. Rancāna 145 godu jubileju. Bolvys mierkis ir na viņ izcyluo latgalīša pīminis saglobuošona, bet ari školuotuoju profesejis populariziešona un juos prestiža paaugstynuošona sabīdreibā, atzeimejūt izcylu un pošaizlīdzeigu pedagogu dorbu.
Ari itūgod seši školuotuoji sajēme eipašu Riharda Cibļa darynuotu saktu, kas jau palykuse par tradicionalu ituo konkursa bolvu. Bolva – sudobra pokovsakta – ir laimis zeime, kam soveiga simboliska i praktiska vierteiba. Izviertejūt pretendentus, žureja pīgrīze viereibu pedagogu spiejom īvīst vysaidus jaunynuojumus sovā dorbā – jaunys pīejis, metodis, strategejis, jū seviški jamut vārā tū, ka īprīškejais vuiceibu gods paguoja golvonom kuortom attuolynuoti. Kai vysod, papyldu punkti viertiešonā tyka tim pedagogim, kas sovā dorbā izmontoj ari latgalīšu volūdu.
N. Rancāna bolvu sajēme: par inovacejom izgleiteibys procesā Viļānu vydsškolys viesturis školuotuoja Valentīna Beitāne i Jura Soikāna Ludzys muokslys školys pedagoge Iveta Ladusāne; par inovacejom izgleiteibys procesā, par jaunom metodem, par intensivu pietnīciskū dorbu, par jaunom tradicejom i par latgaliskajom aktivitatem Nautrānu vydsškolys viesturis školuotuoja Valentīna Turlaja; par par školys kolektivu motivejūšu i prasmeigu attuolynuota dorba organiziešonu Rēzeknis suokumškolys direktore Ilona Stramkale; par radūšu i psihologiski atbolstūšu pīeju attuolynuotūs vuiceibu laikā Kruoslovys Varaveiksnys vydsškolys sporta školuotuojs Dmitrijs Silovs (jis ir ari F37 sporta klasis paraolimpīts škāpa svīsšonā i lūdis gryusšonā, Pasauļa i Eiropys čempions škāpa svīsšonā sovā sporta klasē); Austrumlatvejis Tehnologeju vydsškolys programiešonys školuotuoja Sandra Trošina.
Papyldbolvu nu Latgalīšu kulturys bīdreibys: par īguļdejumu i sasnāgumim latgalīšu volūdys, kulturviesturis i nūvoda vuiceibys īvīsšonā i īdzeivynuošonā školys vuiceibu vidē pyrmsškolys izgleiteibys īstuodis “Annele” (Reigā) školuotuoja Iveta Seimanova, kas ir pazeistama Latgolys etnografiskūs tārpu darynuotuoja; par inovacejom izgleiteibys procesā, pozitivom emocejom sliepņošonys puļceņā Malnovys koledžys, Viļānu Muzykys i muokslys školys školuotuojs Dainis Poikāns; par par školys dorba kolektivu motivejūšu i prasmeigu attuolynuota dorba organiziešonu Daugovpiļs Vaļsts gimnazejis direktora vītneica audzynuošonys dorbā Sandra Rutkovska, par radūšu i psihologiski atbolstūšu pīeju attuolynuotūs vuiceibu vidē Kruoslovys Varaveiksnys vydsškolys latvīšu volūdys školuotuoja Valentīna Purpiša.
Olūts: lakuga.lv
