31. janvarī Latgolys kongresa lāmumu izpiļdis padūmis (LKLIP) puorstuovi – Agris Bitāns, Dainis Mjartāns i Ilga Šuplinska sasatyka ar partejis „Progresīvie” puorstuovim Saeimā: frakcejis prīšksādātuoju Andri Šuvajevu, Cylvāktīseibu i sabīdryskūs lītu komisejis vadeituoju Leilu Rasimu, Tautsaimnīceibys, agraruos vidis i regionaluos politikys komisejis vadeituoju Skaidrīti Ābramu i Aizsardzeibys ministrejis parlamentarū sekretaru Ati Švinku.
Sarunys suokumā LKLIP prīšksādātuojs A. Bitāns īpazeistynuoja kluotasūšūs ar Latgolys kongresa rezolucejis izviertejumu, nūruodūt, ka, kvantitavi izviertejejūt rezolucejis progresu, var redzēt, ka leluokuo daļa izvierzātūs aizdavumu jūprūjom ir tikai uzsuokšonys stadejā. Viertejums svuorstuos 1–2 punktu apleicīnē, partū ka sasnīgti ir tikai simboliskī mierki – Latgolys karūga apstyprynuošona, ceļa zeimu pastatiešona latgaliski i lībiski. Pozitivi teik vārtātys ari atsevišķuos ekonomiskuos dzeivis aktivitatis (kinologejis centra izbyuve, Daugovpiļs Industrialuo parka planavuošona). Fakultativuo latgalīšu volūdys ci nūvodvuiceibys vuiceišona, tok tys ir tikai pilotprojekts 46 Latgolys školom. Ir panuokts, ka Latgolys vaicuojums ir dīnys kuorteibā i nav vysmoz juopīruoda, ka Latvejis i Eiropys drūšeiba lelā mārā ir cīši saisteita ar Latgolys spieju reiceibai i sabīdreibys nūtureibys i pīdereibys apziņu.
Pamata vaicuojumi saistejuos ar drūšeibu, tai kai kluotyn beja Aizsardzeibys ministrejis parlamentarais sekretars A. Švinka, kas aplīcynuoja, ka Aizsardzeibys ministreja cīš lelu viereibu tān veļtej Latgolys vaicuojumam, īsasaista informativi izgleitojūšūs pasuokumu reikuošonā, skaidrojūt sabīdreibai, cik svareiga ir organizāta reiceiba ari krīzē, sasadorboj ar pošvaļdeibom. Tū, ka divkuoršuos infrastrukturys idejis ir realizacejis procesā, apstyprynuoja ari Preiļu Pošvaļdeibys puorstuovi, ar kurim LKLIP tykuos janvara beiguos. Taipoš ministrejis puorstuovs aplīcynuoja, ka informativuos telpys izmainis Latgolā par lobu obom latvīšu volūdys tradicejom ir dorbs, kas doroms kūpā kai KM, tai AM i cytom, tai pilsūniskajai sabīdreibai i Latgolys medejim.
D. Mjartāns pīvierse viereibu, ka Aizsardzeibys ministreja beja rūsynuojuse atsevišķu Latgolys medeju atbolsta projektu par aizsardzeibys nūzares aktualitātem, kab paleidzātu styprynuot Latgolys informativū telpu. Tūmār mainūtīs ministrejas politiskajai vadeibai, projekts natyka īdzeivinuots. Partejis „Progresīvie” puorstuovi nūruodeja, ka rysynuojumi teik maklāti.
LKLIP beja jau agruok syutejuse viestuli, kurā lyudze atsevišķu Cylvāktīseibu i sabīdryskūs litu komisejis sēdi veļteit tīši Latgolys informativuos telpys i sabīdreibys nūtureibys vaicuojumam. L. Rasima aplīcynuoja, ka taida sēde teik plānuota.
Tyka puorrunuots ari Varakļuonu vaicuojums. Gon S. Ābrama, gon frakcejis prīšksādātuojs A. Šuvajevs aplīcynuoja, ka partejā par itū vaicuojumu diskusejis vēļ tik sekuos, kai ari nūruodeja, ka pagaidom sabīdryskajā telpā vīneigais arguments, kas teik nūruodeits VARAM gatavuotajam lykumprojektam par Varakļuonu īkļaušonu Modūnys nūvodā, ir īdzeivuotuoju aptauja. Iztryukst ekonomiskūs kritereju i prognožu.
Sarynys beiguos AM puorstuovs nūruodieja, ka ministrs plānoj vizīti iz Daugovpili 23. februarī, bet Latgalīšu kulturys bīdreiba aicynoj tymā dīnā Leilu Rasimu iz sarunu „Politiskajuos patmaļuos”. Jom var sekuot ari tīšsaistē LKB Facebook kontā.
Pyrms 14. Saeimys vieliešonom LKLIP nūslēdze sadarbeibys memorandus ar vairuokom partejom par Latgolys atteisteibai svareigu vaicuojumu rysynuošonu. Aicynojom taidu paraksteit ari partejai „Progresīvie”.
LKLIP turpynuos sarunys ar Saeimā īvālātajim politiskajim spākim par aktualūs Latgolys vaicuojumu rysynuošonu.
