Latgalīšu kulturys bīdreiba (LKB) 25. augustā 10:00 stuņdēs organizej izgleiteibys nūzaris specialistu tīšsaistis diskuseju “Esi i dori” par aktualajim izgleiteibys vaicuojumim pedagogim, školānim i studentim, ari jūs vacuokim i tim, kuri meklej pošizaugsmis vareibys. Pasuokumā pīsadaleis VISC vadeituoja Liene Voroņenko, Latvejis Universitatis profesors Mārcis Auziņš, “Tilde” biznesa atteisteibys direktors Kaspars Kauliņš, LKB vadeituoja Ilga Šuplinska, Rībeņu vydsškolys školuotuoja Diāna Bravacka, kai ari Rēzeknis Tehnologeju akademijis profesore Sanita Martena.
Tīšsaistis diskusejis daleibnīki akcentēs pošvuiceibys, pošvadeituos vuiciešonuos i digitalizacejis prasmis i kompeteņcis, sagaidūt kluotasūšū vaicuojumus par izgleiteibys īspiejom i sevkura individa atteisteibu. Kai nūruoda pasuokuma organizatore i daleibneica Ilga Šuplinska, kas ilgstūši darbojusēs itamā nūzarē, “Izgleiteibai juoīt kūpsūlī ar myusu dīnu tehnologejom, dorba tierga pīprasejumu i izgleitojamū interešu izmaiņom. Tys nav tikai Reigys vaicuojums, ari Latgolys regionā ir juoinvestej izgleiteibys tehnologeju i parsmu atteisteibā, tys varātu ari pozitivi ītekmēt ekonomiku. Tys ir ari vaicuojums par volūdu, kaidā atsateista tehnologejis. Latgalīšu ir juobyuņ tū volūdu vydā, kas palīk nuokušojom paaudzem.”
Pasuokuma plans:
10:00 īvodvuordi nu Latgolys kongresa lāmumu izpiļdis padūmis (LKLIP)
10:05 “Puoreja iz apvuiceibu latvīšu volūdā i īspiejis saturā” – Liene Voroņenko, IZM, Vaļsts izgleiteibys i satura centrs
10:20 Vaicuojumi i atbiļdis
10:30 “Flirts ar cytaižū, jeb kū vuiceitīs, kod vysys školys pabeigtys?” – Mārcis Auziņš, LU
11:00 Vaicuojumi i atbiļdis
11:10 “Muoksleiguo intelekta volūdys tehnologejis, tūs praktiskī pīlītuojumi šudiņ i reit” – Kaspars Kauliņš, SIA TILDE
11:40 Vaicuojumi i atbiļdis
11:50 “Digitalī reiki i platformys latgaliski” – Ilga Šuplinska, RTA, LKB
12:10 “Digitalūs reiku pīlītuojums školuotuoja praksē” – Diāna Bravacka, Rībeņu vydsškola
12:30 Vaicuojumi i atbiļdis
12:45 Pasuokuma kūpsavylkums, RTA profesore Sanita Martena
Daleiba tīšsaistis diskusejā ir bez moksys, tīšraidi varēs vērtīs gon Latgolys kongresa sātys lopā: http://latgolyskongress.lv/, gon Latgalīšu kulturys bīdreibys Facebook lopā. Interesenti, kas grib uzdūt vaicuojumus, ir aicynuoti jūs īsyuteit iz epastu: latgalisubidreiba@gmail.com voi pasuokuma laikā raksteit FB komentaru sadaļā.
Kontaktinformaceja vaicuojumim: latgalisubidreiba@gmail.com
Pasuokumu organizej: Latgalīšu kulturys bīdreiba, Rēzeknis Tehnologeju akademeja i Latgolys
kongresa lāmumu izpiļdis padūme.Projektu” Latgalīšu kūpīnys lidereibys i pīdereibys styprynuošona, eistynojūt Latgolys kongresa idejis” finansiali atbolsta Sabīdreibys integracejis fonds nu Kulturys ministrejis dūtajim Latvejis vaļsts budžeta leidzeklim.
Projekts teik realizāts nu 03.04.2022. da 31.10.2024.
