Nu 5. oktobra da 14. decembra Kruoslovys i Ludzys nūvodu pīrūbežā, kai ari vysmoz sešūs Rēzeknis nūvoda pogostūs gasteis Latgalīšu kulturys bīdreibys (LKB) i attīceiguos pošvaļdeibys puorstuovi, stuostūt par drūšeibu, vyltus ziņom, leluokūs mitus, civiluos aizsardzeibys i kiberdrūšeibys aktualitatem, nūskaidrojūt pamatvaicuojumus interaktivā spēlē “Kas? Kur? Kod?”. Informaceja byus socialajūs teiklūs, pošvaļdeibuos i pa vacai mūdei – iz afišu stobim.
Projekts paradz LKB bīdru dūšonūs iz 14 pīrūbeža cīmim i 6 piļsātom, spēlejūt spēli “Kas? Kur? Kod?”. Spēlis nūsaukums nav pajemts najauši: 1) vacuokajai paaudzei tys var atguodynuot erudicejis spēli, kas bejuse populara vēļ 20. godu symta izskaņā i 21. godu symta suokumā, tei reikuota ari vītejā mārūgā, 2) jaunuokajai paaudzei i piec byuteibys: itī 3 vaicuojumi ir svareigi kai dezinformacejis, vīglūs ziņu, tai hibridkara i gataveibys kulturys izskaidruojumam.
Spēle dūmuota sevkura daleibnīka īsaistei: 1) nūstyprynūt izpratni par pamatjiedzīnim: hibridkarš, dezinformaceja, viltys ziņa, kiberdrūšeiba, vysaptverūša vaļsts aizsardzeiba i c., 2) konstatejūt uztycamus mediju olūtus, 3) raksturojūt sovu reiceibu krīzis apstuokļūs, 4) lejupluodejūt 112, guņsmyura aplikacejis, kas paleidz izavaireit nu kruopnīkim i byut informātam par krizem, 4) īpazeistūt cert.lv i konkretuos pošvaļdeibys Civyluos aizsardzeibys komisejis jaunumus.
Paguojušuo goda pīrūbeža apmekliejumi ir apkūpuoti prīšklykumūs, kas īsnīgti kai pošvaļdeibom, tai vaļdeibai. Ceram tūs īraudzeit gon plānojūt nuokušuo goda budžeta prioritatis, gon dūmojūt par eipašu mierķprogramu, kū gatavoj Eiropys Padūme vaļstim, kas rūbežojās ar agresorvaļstim. Asam sapratuši, ka cīš svareiga ir pošvaļdeibu i Civylūs aizsardzeibys komiteju puorstuovu kluotbyutne. Komunicēsim ari ar jim, kab izgleituotu jūs leidzeigu pasuokumu organiziešonā, aicynuosim leidza tikšanuos, kab veiduotu tīšu kontaktu i informacejis apriti, kas ir vajadzeiga kasdīnā i var nūderēt ari krizis situacejā.
Ka Tev ir kas sokams vaļdeibai, vītejai ci nacionalajai, sābram, draudzeigam ci na vysai saprūtamam, i tu vari izateikt na tik viņ socialajūs teiklūs, a dzeivūs cylvākūs,
Sekoj leidza informacejai, tok jau tān zinim, ka Ludzys nūvodā byusim oktobrī, Kruoslovys nūvodā – novembrī, tok Rēzeknis nūvodā – decembrī. Tyvuokuo tikšanuos reize ir 5. oktobrs: 11:00 Mērdzinis Kulturys nomā, bet 15:00 – Kuorsovys Kulturys nomā.
Projekts taps ar Latvejis Republikys Aizsardzeibys ministrejis atbolstu.
Ilga Šuplinska,
Latgalīšu kulturys bīdreibys vadeituoja
