15. decembrī 13:00–17:00 Ludzys nūvoda Leidumnīkūs, Leidumnīku bīdreibys Lelajā zalā, Latgalīšu kulturys bīdreiba sadarbeibā ar bīdreibu “Leidumnīki” i ar Aizsardzeibys ministrejis atbolstu reikoj nūslāguma pasuokumu, kurā pasadaleis pīredzē par īgiutajim datim i situaceji Kruoslovys i Ludzys nūvodu pīrūbežā.
7 nedelis nūgalis treis tāli – Vieju Rozale, Klāvu Tekļa i Plotku Jurs – ar humora elementim (anekdotis, puorprotumu skečs, hiperbolys i tt.), muzykys i multimediju paleidzeibu runuoja ar vītejū kūpīnu par vysaidom aktualom lītom: dezinformaceju, problemys definiešonys i rysynuošonys īspiejom, gataveibu krizei i sabīdreibys nūtureibu. Ari tom temom, kas reti teik pamaneitys regiona voi vaļsts leimenī saisteibā ar pīrūbežu: kas nūsoka konkretuos vītys pīviļceibu, ar kū vītejī lepojas; kaidys problemys jūs uztrauc i kai tū varātu rysynuot; kaidus informacejis olūtus jī izmantoj, kai izviertej informaceju i kū itymūs paradumūs var i vajag maineit.
Itū šaļti ir nūtykušys sarunys 14 nu 15 pogostim, asam regulari publiciejuši eisys reportažys nu pogostim, suokuši apkūpuot “Problemu barometrus”, īgyvuši spylgtu, tai pošā laikā absoluti naperspektivu dzeivis kasdīnys ainu pīrūbežā. Gribim pasadaleit sovā pīredzē i tuoluokai rysynuošonai, sabīdreibys viereibys kuopynuošonai nūdūt pogostu problemys, kas dalieji ir rysynomys pošvaļdeibys, dalieji regionaluos politikys ītvorūs vaļstī kūpumā. Tai kai vīns nu pamatvaicuojumim ir bejs drūšeibys vaicuojums, tod iz nūslāguma pasuocīni aicynojam Aizsardzeibys ministrejis puorstuovi stuosteit par prioritarajim pasuokumim itamā jūmā taišni Latgolā, Vaļsts Gunsdzieseibys i gluobšonys dīnasta puorstuovi par jūmom, kas skar dzeivuotuoju gataveibu krizei, kai ari CERT.lv puorstuovi par kiberdrūšeibu cylvāka kasdīnā.
Nūslāguma pasuokumā byus treis pamatdalis: 1) stuostejums par aktualitatem i atbiļdis iz vaicuojumim nu atbiļdeigūs organizaceju pusis, 2) diskuseja “Kai panuokt, ka sevkurs sabīdreibys puorstuovs ir informāts i kai styprynuot sabīdreibys nūtureibu”, pīsadolūt Kruoslovys i Ludzys sadarbeibys teritorejis Civiluos aizsardzeibys komiseju puorstuovim, kai ari 3. Latgolys brigadis atbiļdeibys teritorejis bataljonim. Pasuokuma vīns no pamatmierkim – izveiduot saikni storp CAK i NVO, kūpīnys puorstuovim, kas sabrauks iz Leidumnīkim nu 15 pogostu. Trešajā daļā byus vareiba kļyut par izgleitojūšuo sarunu šova daleibnīku i pasaklauseit latgalīšu muzyku.
Projekts taps ar Latvejis Republikys Aizsardzeibys ministrejis projektu konkursa “Atbolsts Latgolys informativuos telpys styprynuošonai” finansiejumu.
Ilga Šuplinska,
Latgalīšu kulturys bīdreibys vadeituoja
