19. aprelī Latgolys kongresa lāmumu izpiļdis padūmis (LKLIP) puorstuovi Agris Bitāns, Aldis Bukšs i Edeite Husare sasatyka ar politiskuos partejis “Progresīvie” Saeimys frakcejis deputatim Leilu Rasimu, Kasparu Briškenu i Edgaru Zelderi, kai ari deputata paleigim Ivaru Bandoni i Daini Miglānu. Sasatikšonys īmeslis beja deputata Briškena nakorektī izteicīni par latgalīšu i lībīšu volūdom budžeta pījimšonys laikā, bet tuos mierkis beja īpazeistynuot ar latgalīšu volūdys situaceju, Latgolys skongresa padūmis dorbu i apsprīst vaicuojumus i vierzīņus, kas byutu vajadzeigi, kab paleidzātu atsateisteit Latgolys regionam. Tai kai partejis frakcejā ir ari nu Latgolys īvālātuo deputate Leila Rasima, bet juos paleigs Dainis Miglāns ir nu Daugovpiļs, tod sasatikšona nūtyka obejuos latvīšu volūdys tradicejuos.
LKLIP i partejis puorstuovu sasatikšona īsasuoce ar nalelu zynuošonu testu-atguodynuojumu par svareigim punktim Latvejis viesturē, kas skar Latgolu, par kurim leluokuo daļa sabīdreibys nazyna voi naīsadūmoj. Tys paleidzēja kluotyn asūšajim puordūmuot jau zynomū i nazynomū, kai ari vīgļuokā veidā īsuokt sarunys.
Tuoļuokuos sarunys beja jau par konkretom sferom – Latgolys ekonomiskuo situaceja, satiksmis infrastruktura, latgalīšu volūda školuos i cytys, kas skar ari Latgolys kongresa rezoluceju i atbaļsteit vajadzeiguos iniciativys, kab situaceja regionā uzalobuotu. Vysim kluotyn asūšajim beja skaidrys, ka vajadzeigs leluoks dorbs pi vaļsts atteisteibys dorba taišni regionu vierzīnī.
“Progresivūs” puorstuovi izruodeja interesi īpasazeit vaira ar plānim, reiceibom, kas jau ir izvierzeiti, kab uzlobuotu Latgolys regiona pozicejis. Taipat deputats Kaspars Briškens atsavainuoja par sovim izteikumim, nūvērtēja latgalīšu gataveibu skaidruot asūšū situaceju i aicynuoja ari iz prīšku, cik ir vareiba, sasadorbuot, kab problemvaicuojumi tyktu rysynuoti.
