Latgalīšu kulturys bīdreiba (LKB) sadarbeibā ar Rēzeknis nūvoda pošvaļdeibu organizej Turisma forumu latgalīšu kūpīnys lidereibys i pīdereibys styprynuošonai. Tys nūtiks 2. junī Lūznovys muižā. Pyrmuo sasatikšona ar turisma nūzaris ekspertim byus jau 26. aprelī tīšsaistē. Pasuokumus interesenti varēs apmeklēt bez moksys.
Pasuokumūs tiks aicynuoti Latgolys regiona, nacionala i storptautyska mārūga turisma eksperti, kuri teikluošonuos formatā diskutēs par aktualitatem i daleisīs ar sovim pīredzis stuostim. Itaids formats ļaus sevkuram dalinīkam īgiut napīcīšamuos zynuošonys i īmanis, kab nūdrūšynuotu sova pakolpuojuma ci produkta atteisteibu.
26. aprelī nūtiks tīšsaistis ekspertu īsapazeišonys pasuokums. Tymā eksperti prezentēs turisma jūmys atteisteibys teņdencis pasaulē i Latvejā, stuosteis par nūzaris vareibom sarežgeitajā geopolitiskajā i ekonomiskajā situacejā, runuos par teiklošonuos nūzeimi ari papildfinansiejuma īgivei. Tīšsaiste byus www.latgolyskongress.lv. 2. junī 11.00 stuņdēs suoksīs kluotīnis pasuokums Lūznovys muižā, kur foruma dalinīki diskutēs par praktiskys dobys vaicuojumim ar jūmys ekspertim, kai ari meklēs rysynuojumus turisma jūmys atteisteibai sovā regionā. Programa i pīsateikšanuos veidlopa byus atrūnama LKB FB tyvuokajā laikā.
2023. godā teik plānuoti 2 kluotīnis i 5 tīšsaistis pasuokumi par vysaidim Latgolys kongresa rezolucejis tematim: izgleiteiba, uzjiemiejdarbeibys atteisteiba, drūšeiba. Sevkurā pasuokumā pīsadaleis attīceiguos jūmys puorstuovi Latgolys regionā. Kab veicynuotu teikluošonūs i sadarbeibys veiduošonu, forumā teik aicynuoti konkretuo nūvada aktīvuokī izgleiteibys, kulturys īstuožu, NVO puorstuovi.
Projekts teik eistynuots, realizejūt Latgolys kongresa rezoluceju, izgleitojūt sabīdreibu piļsūniskuos leidzdaleibys vaicuojumūs i uzturūt kūddarbeibys aktivitatis vysaidu nūzaru grupuos.
Pasuokumu organizej: Latgalīšu kulturys bīdreiba, Rēzeknis nūvoda pošvaļdeiba i Latgolys kongresa lāmumu izpiļdis padūme.
Projektu” Latgalīšu kūpīnys lidereibys i pīdereibys styprynuošona, eistynojūt Latgolys kongresa idejis” finansiali atbolsta Sabīdreibys integracejis fonds nu Kulturys minestrejis daškieratjim Latvejis vaļsts budžeta leidzeklim. Projekts teik realizāts nu 03.04.2022. da 31.10.2024.