Atsaveram iz Latgolys kongresa 2022 nūtikšonom i vaicojam kongresa dalinīkim jūs redzīni par padareitū i vēļ doramū.
Aldis Bukšs (Tīslītu ministra padūmnīks, Bolvu nūvoda dūmis deputats), Latgolys kongresā vadeja Tīseibu, viesturis, drūšeibys i ekonomikys seseju “Pošvaļdeiba, administrativi teritorialuo reforma i Latgola kai teritorialuo vīneiba Latvejā”.
Kas Jiusim Latgolys kongresā beja vysnūdereiguokais, kas vysvairuok uzrunuoja?
Aldis Bukšs: “Vysnūdereiguokais, voi dreižuok sokūt pacyluojušuokais, beja lelais daleibnīku skaits i sajiuta, ka latgaliskais ir svareigs tik daudzim cylvākim. Tys sylda sirdi. Beja nūdereigys diskusejis i informaceja, kuru izmontuošu turpmuokajā dorbā. Pīmāram, jūprūjom atguodoju Norvegejis puorstuova stuostu par tū, kuo jī īsaista sabīdreibu vītejuos pošvaļdeibys atteisteibys planu radeišonā i infrastrukturys uzlobuošonā.”
Kur Jius pats varātu īsasaisteit nuokušajūs 5 godūs, pi kaidim vaicuojumim esit gotovs struoduot?
Aldis Bukšs: “Asmu jau uzjajiems struoduot pi tautsaimnīceibys i uzjiemiejdarbeibys veicynuošonys dorbim, nu pa lelam asu puorlīcynuots, ka pīcu godu termiņā saīs struoduot ar dažuodu temu vaicojumim. Leidzeigi kuo īprīškejūs godūs struodovu i pi latgalīšu literaturys, i latgalīšu viesturis populariziešonys (iniciativa par nacionalūs partizanu nūmetnis atjaunuošonu Stompaku pūrā), i latgalīšu volūdys veicynuošonys skūluos, i volūdys konsultanta omata vītys izveidis Vaļsts volūdys cenrā, i ceļa zeimu latgaliski uzstuodeišonys.”
