Latgolys kongresa eiszinis
Saīta rezolucejis izpiļdis komiteja (SaRIK), pīsadalūt Latgalīšu kulturys bīdreibys vaļdei, ir apstyprynuojuse 258 kongresa delegatu, nu kurim leluokū puorstuovnīceibu veidoj dzeivuotuoji – 92, puorstuovi nu piļsūniskūs organizaceju – 49, izgleiteibys īstuožu – 38, uzjiemieju vidis – 34, pošvaļdeibu – 22. Bazneicys, diasporys, viesturiskūs zemu i organizātuoju puorstuovu ir 12 i 11 organizātuoju. Kongresam pīsasacejs 40 klauseituoju.
Kongresa zynuotniskajai daļai ir pīsaceiti 25 ziņuojumi (30 referenti). Īsyuteituos tezis pamatā aktualizej izgleiteibys, volūdys i ekonomiskūs vaicuojumus.
Kai jau ziņuots, 28. aprelī Rēzeknis Tehnologeju akademejā dorbs nūtiks 4 paraleluos tematiskuos jūmuos: latgalistika, izgleiteiba i volūda (divejis sekcejis), ekonomiskī procesi i uzjiemiejdarbeiba (obejis jūmys kūpā) i tīslītys, drūšeiba, viesture.
Itamā šaļtī teik saskaņuota programa, kurā akcents ir lykts iz zynuošonu puornesšonys i praktyskuos lūmys palelynuošonys latgalīšu volūdys sistematiskuma nūstyprynuošonā izgleiteibys procesā, volūdys styprynuošonā informativajā, digitalajā i plašsazinis leidzekļu telpā, vaļsts puorvaļdis izlobuošonā i drūšeibys styprynuošonā, taipat konkretu tautsaimnīcisku prīšklykumu izviersšonai regiona, vaļsts i Eiropys kontekstā. Tys zeimoj, ka kluot pi ziņuotuoju, kas jau ir pīsasacejuši, byus aicynuotī eksperti, kas stuosteis par sovu pīredzi praktisku vaicuojumu rysynuošonā.
Nūtykumi Ukrainā ir nadaudz aizkaviejuši kongresa planuošonu, tymā pošā laikā rūsynuojuši izveiduot vysmoz divejus paneļus, kur pamattema byus drūšeibys i informativuos telpys vaicuojumi, tymā skaitā viestejumi i medeju platformys taišni mozuokumtauteibu cylvākim pīrūbežā.
Nuokušuos nedelis laikā plotuok pasaruodeis kongresa programa i tiks aicynuoti pīsasaceit plašsazinis leidzekļu puorstuovi.
Latgolys kongresu informativi atbolsta: “Vietējā Latgales avīze”, Latgalīšu kulturys ziņu portals lakuga.lv, Latvejis Radio Latgolys studeja, Rēzeknis Tehnologeju akademeja
