Sabīdreibā daudz runoj par napīcīšameibu školā vuiceit latgalīšu volūdu i dziļuok īpazeit Latgolys kulturys vierteibys. Bet voi teik nūvārtāts i izvārtāts jau padareitais? Vaļsts Izgleiteibys satura centra sātyslopā storp programu paraugim vyspuorejā videjā izgleiteibā atrūnami nūvodu vuiceibys i latgalīšu rokstu volūdys programu paraugi, ari latgalīšu rokstu volūdys 1.–9. klasei programys paraugs, vuiceibu prīškmata standarti i vuiceibu leidzeklis “Olūteņš”. Puorsaverit i izviertejit!
Nūvodu vuiceibys specializātuo kursa programys paraugu Vitys Jaunozolys vadeibā izstruoduoja Antra Grūbe, Roberts Ķipurs i Liene Ozoliņa, leidzdorbojūtīs Ilgai Šuplinskai (bejušuo izgleiteibys i zynuotnis ministre), Mārai Mellēnai, Aīdai Rancānei i Solvitai Lodiņai.
Nūvoda vuiceibys kursa izstruoduotuoji pastreipoj, ka kursam i programai nav varama unificāta pīeja, prīkšmata specifika izceļ lokalū sovpateibu i nūtikšonu (nūvoda, cīma, kūpīnys, saimis) saleidzynuošonu ar informaceju par nacionalom i globalom nūtikšonom, kūpeiguo i unikaluo īraudzeišonu, izviertiešonu. Programys paraugs juoīdzeivynoj ar vītejūs resursu izmontuošonu i īsaisti: muzeji, arhivi, uzjāmumi, omotu meistari, dzymtys, saimnīceibys, muokslinīcyskuos jaunradis grupys. Tys, kurys nūzaris pedagogs, filologs, geografs, etnografs, viesturnīks, bibliotekars, arhivists, kulturys darbinīks voi kaids cyts, vuiceis itū kursu, nūsaceis akcentus saturā. Nūvodu vuiceibys programys paraugs ITE, tam veļteitu seminaru var nūsavērt ITE.
Portals aicynoj skaiteituojus pīsadaleit aptaujā, atbiļdūt iz vaicuojumu voi komentejūt par Latgolai veļteitū pīduovuojumu nūvodu vuiceibys programys paraugā.
Vyspuorejuos videjuos izgleiteibys specializātuo kursa programys paraugs izstruoduots ari latgalīšu rokstu volūdā ITE. Jū sagataveja Veronika Dundure (dorba grupys vadeituoja) i Anna Vulāne, zynuotniskā aspektā recenzēja Dr. philol. Sanita Martena, vuiceibu saturu – Mg. paed. Laila Budreviča. Specializātuo kursa “Latgaliešu rakstu valoda” mierķis ir veicynuot sapratni par latgalīšu rokstu volūdu i kulturu kai unikalu Latgolys regiona i Latvejis boguoteibu, atteistūt idejis par ituo kulturviesturiskuo montuojuma transformiešonys īspiejom 21. godu symtā.
Programu paraugu pamatizgleiteibys sadaļā atrūnams latgalīšu rokstu volūdys 1.–9. klasei programys paraugs – ITE. Jū izstruoduojušys Aelita Andrejeva, Veronika Dundure (projekta vadeituoja), Anna Vulāne i Vanda Žulina. Vuiceibu prīkšmata programys parauga zynuotniskuo recenzente Dr. philol. Sanita Martena, vuiceibu satura recenzente Mg. paed. Laila Budreviča.
Latgalīšu volūdys apgive paredz diferencātu pīeju, kurā “juojam vārā, voi školāns runoj sovā dzymtajā izlūksnē voi viņ latvīšu literarajā volūdā, voi juo dzymtuo volūda ir latvīšu voi cyta volūda”. Latgalīšu rokstu volūdai ir jau agruok Latgalīšu volūdys, literaturys i kulturviesturis školuotuoju asociacejis izstruoduots vuiceibu prīkšmata standarts 4.–9. klasei ITE i standarts 10.–12. klasei ITE. Taipat ir daīmams Lidejis Leikumys, Veronikys Dunduris i Annys Vulānis “Olūteņš”, vuiceibu leidzekļu komplekts latgalīšu rokstu volūdā 4. klasei (2017) – vuiceibu leidzeklis školānim ITE i metodiski īsacejumi školuotuojim ITE.
Olūts: portals lakuga.lv
